Kæru Keilisfélagar.

Fyrir hönd stjórnar GK, langar mig að þakka ykkur fyrir nýliðið ár og óska ykkur öllum farsældar á komandi ári.

Nýliðið ár var gott golfár og voru vellir okkar mikið sóttir af félagsmönnum enda eigum við einn besta golfvöll landsins og skipum okkur í hóp virkustu kylfinga landsins. Árið byrjaði þó nokkuð seint en Hvaleyrarvöllur var ekki opnaður fyrr en 27. maí og lokað var fyrir golfbíla í Hrauninu fram að meistaramóti. Aðsóknin í bæði júlí og ágúst var sú mesta sem hefur sést um árabil hjá okkur enda vorum við öll orðin mjög golfþyrst. Þetta speglaðist einnig í svörum Keilisfélaga við skoðanakönnun á vegum GSÍ núna í sumar. 74% GK félaga svöruðu þá að frekar erfitt eða mjög erfitt hafi verið að fá hentugan rástíma samanborið við 51% meðaltal úr öðrum klúbbum á höfuðborgarsvæðinu.

Já þessi verðmæti ,rástímarnir‘ sem við eigum öll saman, voru svo sannarlega meira eftirsótt en áður. Hér að neðan er mynd með tölum um notkun okkar á rástímunum á Hvaleyrarvelli árið 2023.

Eins og sést á myndinni þá voru 1.313 meðlimir sem staðfestu sig á rástíma. Í heildina eru 1.346 meðlimir á Hvaleyrarvelli sem gerir 98% meðlima skráðu sig á rástíma og staðfestu spil sem er mjög ánægjulegt að sjá. Að jafnaði spilaði hver meðlimur 19,6 hringi á árinu, en nokkur munur er á þessu meðaltali eftir aldursflokkum eins og sést í myndinni. Aldursflokkurinn 71+ sker sig nokkuð úr með hærra meðaltal spilaðra hringja 27,7, en einnig leika meðlimir í þessum flokki um 80% af sínum hringjum fyrir klukkan 15:00.

Langstærsti hópur meðlima er aldursflokkurinn 27-70, en um 73% spilaðra hringja á árinu voru leiknir af þessum hópi. Þetta er sá hópur í okkar félagsskap sem greiðir fullt gjald en aðrir hópar njóta afslátta. Eins og sést á myndinni þá skiptist spil þessa hóps nokkuð jafnt 24-27% yfir daginn í hverju tímabili.

Ásókn í golf á vafalaust eftir að halda áfram að aukast og er umræða í öllum klúbbum á höfuðborgarsvæðinu um áskoranir er tengjast meiri ásókn. Sem dæmi eru klúbbarnir farnir að eiga í vandræðum með að sinna viðhaldi og  umhirðu á vellinum vegna álags, því sérstaklega er orðið þétt setið á völlum snemma dags. Meðlimir eru einnig farnir að eiga erfiðara með að fá rástíma, en það var þó ánægjulegt að sjá góð viðbrögð meðlima við 2 klst. tímamörkum  fyrir afskráningu sem gaf á endanum betri nýtingu á rástímum síðasta sumar.

Við í stjórninni viljum leggja áherslu á opið samtal um aðgengi og nýtingu á völlunum okkar og viljum hvetja ykkur til að koma með tillögur og athugasemdir sem gætu gert samveru í félagsskapnum okkar enn ánægjulegri. Endilega látið í ykkur heyra í athugasemdakerfinu og fáum uppbyggilega umræðu í gang.

Gleðilegt nýtt ár.

f.h. stjórnar Keilis.

Guðmundur Örn Óskarsson.