Þá er fyrsti keppnisdagur runninn upp í mestu golfveislu ársins hér hjá okkur í golfklúbbnum Keili. Það var Svavar Þrastarson sem sló fyrsta höggið í mótinu í þetta skiptið enn hann keppir í 4. flokki karla og hóf fyrsti ráshópur leik stundvíslega klukkan 07:00 í morgun í blíðskaparveðri.
Veðurspáin þessa vikuna er mjög góð og er von á spennandi keppni í öllum flokkum.
Næstu vikuna munu 350 félagsmenn keppa til síðasta blóðdropa í sínum flokkum.
Í þetta sinn er keppt í 26 flokkum og er yngsti keppandinn 8 ára og sá elsti 91 árs. Við hvetjum alla áhugasama að heimsækja okkur í golfskálann í vikunni og fylgjast með spennandi keppni í öllum flokkum.
Öllum herlegheitunum verður svo fagnað myndarlega á n.k laugardag á lokahófi meistaramótsins þegar krýndir verða nýjir klúbbmeistarar í Meistaraflokkum karla og kvenna.
Gangi öllum vel og góða skemmtun.
