Braut 1 - Alfaraleið
Brautin er hæðótt og býður upp á ýmsar niðurkomur og legur. Kletturinn sem skagar inn í brautina getur haft áhrif á teighöggið. Betra að halda boltanum vinstra megin. Flötin er frekar lítil og því mikilvægt að hitta hana í innáhöggi.
Braut 2 - Klapparhóll
Þessi braut er stutt og liggur í lykkju í kringum hraunklett sem getur truflað teighöggið. Nauðsynlegt er að koma teighögginu á braut og óvitlaust að slá með járnkylfu af þessum teig. Ekki er þó allt kálið sopið efitr gott teighögg því mjög erfitt er að hitta flötina sem er handan við "sprunguna" svokölluðu. Aftan við flötina er grashóll en þess utan er hraunið.
Braut 3 - Háanef
Brautin er stutt en þröng og mikilvægt er að ná beinu teighöggi. Flötin er falin innan um háa hraunskorpuna og er á þremur stöllum. Hraunið liggur alveg upp að flatarkantinum að aftanverðu en flötin er nokkuð opin ef komið er að henni frá hægri. Oft þurfa kylfingar að slá blint inn á þessa flöt og nauðsynlegt er að boltinn stöðvist sem fyrst eftir niðurkomuna á flötina.
Braut 4 - Varðan
Fjórða holan er nokkuð erfið par þrjú hola og hér eru kylfingar eins fjarri klúbbhúsinu og komist verður í "Hrauninu". Hættur eru ekki miklar á þessari holu nema helst fyrir aftan flötina og hægra megin við hana. Flötin er nokkuð stór og ætti að vera aðgengilegt að stöðva boltann á henni. Á þessari holu getur því skorið fyrst og fremst verið undir púttunum komið.
Braut 5 - Bugðan
Hér þarf teighöggið að fljúga yfir mikla hraunbreiðu og lenda á braut sem hallar frá hægri til vinstri. Löng teighögg eiga á hættu að fara yfir brautina vinstra megin og út í hraun en þó er þar örlítill röffkantur og stöðvast boltinn þar gjarnan. Hraunið er hægra megin brautarinnar og ef kylfingar vilja komast klakklaust inn á flötina er nauðsynlegt að halda sig á braut. Flötin er stór og mikil brekka vinstra megin á henni. Rétt er að forðast að vera of langur í innáhögginu.
Braut 6 - Gjótan
Falleg par þrjú hola sem lætur engan ósnortinn. Flötin sést aðeins að hluta til frá teignum þar sem að hátt hraunið skyggir á. Örlítil braut liggur vinstra megin með hrauninu en ef teighöggið á að fara á flötina þarf að slá hátt og hnitmiðað högg sem stöðvast fljótt. Það hjálpar þó til að flötin hallar örlítið frá teignum. Hraunið liggur nálægt flötinni hægra megin og fyrir aftan og geta "slæsarar" því átt í erfiðleikum með hana þessa.
Braut 7 - Grænaskjól
Mikið landslag er í þessari braut og gríðarlega stór dalur er í grennd við lendingarsvæði flestra teighögga oft nefndur "dauðadalurinn". Brautin liggur í hundslöpp til hægri en innkoman á flötina er í nokkurs konar vinkil til vinstri. Brautin er mjög breið þar sem teighöggin lenda en ef vel á vera þarf annað höggið að fljúga yfir hraunið og lenda þvert á nokkuð þrönga brautina eða inn á flötina. Þessa glæsilegu stóru flöt er þó nauðsynlegt að nálgast með gát því hraunið er skammt utan hennar.
Braut 8 - Selstígur
Á áttundi holunni í "Hrauninu" leynast hætturnar fyrst og fremst í kringum flötina og flötin sjálf er ein sú erfiðasta á vellinum. Brautin er nokkuð breið og beggja megin hennar er röffkantur sem stöðvar bolta sem eru á leið í hraunið. Gott er að halda sig hægra megin í teighögginu því innáhöggið er oft þægilegra þaðan. Í kringum flötina er nánast engin braut eða röff, aðeins bert hraunið. Þrír stallar eru á flötinni og talsvert landslag.
Braut 9 - Þvottaklettar
Brautin er nokkuð breið en betra er að vera vinstra megin því kletturinn hægra megin getur verið til trafala ef menn ætla inná flöt í tveimur höggum. Tjörnin, með tignarlegum gosbrunninum fyrir framan geysistóra flötina, kemr kylfingum fyrir sjónir sem bæði falleg og ógnvekjandi. Innáhöggið þarf því að vanda vel svo það lendi á góðum stað á flötinni. Betra er að vera of langur en of stuttur. Á flötinni eru tveir stallar en fyrir utan tjörnina eru ekki miklar hættur umhverfis flötina.
Braut 10 - Sandvík
Miklar breytingar á 10. flötinni hafa gert þessa holu eina af skemmtilegustu og fallegustu holum landsins. Flötin, sem er gríðarlega stór, er vel varin af djúpum glompum fyrir framan og hægra megin við flötina. Að auki eru vallarmörkin sem fyrr til vinstri. Ef leikmaður hittir flötina þá er eftirleikurinn langt frá því að vera auðveldur., því mikill halli skiptir henni í miðjunni, sem gerir púttið mun erfiðara. Par er alltaf þegið fegins hendi.
Braut 11 - Sandbrekkur
Brautin er í hundslöpp til vinstri og fremur mjó og hallar öll frá hægri til vinstri í átt að vallarmörkunum. Betra er að vera hægra megin í teighögginu en þó ekki of mikið því röffið er erfitt. Fyrir högglengri spilara eru tvær glompur hægra megin brautar ógnandi. Vinstra megin er hættulegt röff með mikið af stórgrýti. Flötin er nokkuð djúp og umsetin þremur mjög erfiðum glompum. Handan flatarinnar er brött brekka sem endar utan vallar svo ekki er gott að vera of sterkur í innáhögginu.
Braut 12 - Hrafnabrekkur
Brautin hallar öll frá vinstri til hægri. Mjög erfitt er að staðsetja teighöggið á braut. Betra er að vera vinstra megin í teighögginu því hægra megin við brautina er mikil brekka. Brautarglompa vinstra megin getur þó sett strik í reikninginn en margir spilarar geta þó slegið yfir hana á góðum degi. Nokkur hæðarmunur er á brautinni og flötinni sem er nokkuð stór og slétt. Í kringum flötina er brekka niður á við og því oft betra að fara varlega í innáskoti og láta boltann rúlla inná flötina.
Braut 13 - Hvaleyri
Þetta er löng par fjögur hola og hætturnar helst að finna næst flötinni. Brautin er breið en glompa tekur við boltum sem fara vinstra megin og djúpt röffið gleypir boltana hægra megin. Flötin er stór en innákoman er þröng því beggja megin flatarinnar eru glompur. Innáhögg með löngu járni eða trékylfu getur því verið erfitt. Þetta er erfið hola og í norðlægri vindátt er hún beinlínis eins og par fimm hola.
Braut 14 - Vesturkot
Fjórtánda holan er bein og stutt og sem fyrr er hætturnar helst að finna nærri flötinni. Brautin er breið og hallar lítið eitt frá hægri til vinstri í átt að tveimur löngum brautarglompum en hægra megin eru einnig tvær litlar glompur. Svæðið í kringum flötina hallar allt frá hægri til vinstri og því betra að beina höggunum hægra megin á flötina. Vinstra megin við flötina er brött brekka sem endar í glompu sem erfitt getur verið að slá úr. Flötin sjálft er frekar lítil og því góður möguleiki á einpútti.
Braut 15 - Fúla
Brautin er löng og í örlitla hundslöpp frá vinstri til hægri en högglangir geta þó náð inn á flöt í tveimur höggum. Hægra megin brautarinnar ráðast vallarmörkin af Sjávarbökkum. Vinstra megin við brautina í grennd við lendingarsvæði teighöggana eru fjórar brautarglompur. Um hundrað metrum fyrir framan flötina eru fjórar litlar glompur sem ber að varast og í kringum flötina sjálfa eru þrjár glompur til viðbótar. Flötin sjálf er í meðallagi stór og liggur mjög nærri vallarmörkunum.
Braut 16 - Drundur
Sextánda holan er skemmtileg par þrjú hola sem marga dreymir um að klára á einu höggi. Teigurinn er nokkru hærri en flötin sem er afar heppilegt þar sem rétta höggið er hátt með litlu rúlli. Flötin er mjög smá með bröttum kanti fyrir aftan og hægra megin. Fyrir framan og vinstra megin við flötina eru glompur og fyrir aftan er grasrenna þaðan sem erfitt getur verið að ná góðu vippi. Aftan við grasrennuna er fjaran sem ætti að sjá til þess að kylfingar séu ekki of gráðugir í teighögginu.
Braut 17 - Flókabraut
Brautin liggur í hundslöpp frá hægri til vinstri og teighöggið þarf að slá blint yfir hæð þar sem við tekur breið brautin. Vinstra megin brautarinnar er þungt röff sem gerir þeim erfitt fyrir sem reyna að stytta sér leið inn á flötina. Flötin er geysistór en umkringd glompum og hægra megin er gamall steyptur skúr sem getur truflað innáhögg og vipp. Innáhöggið þarf að vera vel framkvæmt ef komast á nærri hlunni en þegar til kastanna kemur eru það púttin sem skipta mestu.
Braut 18 - Sælakot
Þetta er löng par fjögur hola en brautin er nokkuð bein alla leið en hallar frá hægri til vinstri þar sem lendingarsvæði teighöggana er. Glompa er í röffinu hægra megin og því þjóðráð að halda sig vinstra megin í teighögginu. Gamli garðurinn við veginn framan við flötina er hættulegur. Flötin er stór á tveimur stöllum og hægra megin við hana er brött brekka sem í eru þrjár mannhæðadjúpar glompur. Við aftanverða flötina er enginn braut og liggja grónar klappir upp að flatarkantinum. Vallarmörk eru svo aðeins örfáa metra aftan við og hægra megin við flötina og markast af göngustíg sem þar liggur.
